2Th 2 | WSK | STEP | Nanga singsang, ana nanga Biya Jesus Kristus akingtala peleruk tairuk se ilak biguwunakko mu ko balnakko. Ana iwita ninga manorsan:

2 Thessalonians 2

Kari Memek Munan Kiawara

1 Nanga singsang, ana nanga Biya Jesus Kristus akingtala peleruk tairuk se ilak biguwunakko mu ko balnakko. Ana iwita ninga manorsan: 2 Kari saki balsan Kari Biya ko tom ^{▼▼2 Thes 2:2 Den “Kari Biya ko tom” mu bala bo Old Testament te biyala aniso se Paul tam te balam. Den umutang mu tom Kaem ko gomang magara wetang te bitirukko wore ko balso. Tom mu te nu ko kariimet ningo diram mu nunga sanguk se yawarakala bagomonko. Bare nu kariimet memek alo mu ikup nungarukko. Tom Jesus peleruk tairukko tom mu te mu uwutata aratukko: 2 Thes 1:6-10.} mu tai aratam masan. Bare kari bo bur te uwuta baluk agi, den daula bo uwuta mu ikial agi, nuna nanga balmon ana tam gawa te uwuta balman mamon, bare nina den mu ko me tingal ale ikia me ninga morukko! Mu den kawel. 3 Kari saki yam nungarkiwaral se munan saki te me ninga kulurmonko!

Kari Biya ko tom mu ipi me aratukko. Kariimet suen biya Kaem nubiring tumon ale, kuring bataguru se bagomon se, aking Kari Memek Munan Kiawara, kari mu nu udagi tama ningi namurukko, mu wetang te aratuk asele, Kari Biya ko tom aratukko. 4 Kari Memek Munan Kiawara umutang nu kota numi patawuruk ale, kaem duap duap kariimet nunga nunup patowasan wore suen la nunga nunup menawurokko ago kaeruk ale, ali imi te nu kota suwanta kari biya bagurukko ago kaerukko. Ale nu Kaem ko temple ningi kasu nagurok daigok ale numi baluk nu Kaem ma numi balukko. ^{▼▼2 Thes 2:2-4 Kariimet suen biya Kaem nubiring tumonko: Mat 24:11-12; 1 Tim 4:1. Antichrist: Daniel 11:36; Mat 24:15; 1 John 2:18 4:3; Rev 13:5-6.}

5 Nina tom ani nengerak baga se mel suen la imi ko ninga manem mu ko ikiwasan agila? 6 Se nina mel Kari Memek Munan Kiawara mu tagi guramuwoso mu ko ikiman, mu noko tom nunguning te asele aratukko se tagi guramuwoso. 7 Kuring batoga, munan kiara, mu maingkala ningi la ura bitawoso. Bare kakirip munan mu ira muruwoso mu eng butata bitiruk, nama tom nu tagi tauk, 8 asele Kari Memek Munan Kiawara mu wetang te aratukko. Se Kari Biya Jesus tairuk ale ko kuring ko daula te moruk ale, ko nikitang te tairukko mu te nu menawurokkowo! ^{▼▼2 Thes 2:8 Kari Memek Munan Kiawara mu memek taukko: Rev 19:14-21.}

9 Kari Memek Munan Kiawara mu Satan ko sokel ago tairuk ale, kilek munan kawel bibiya duap duap nunguningkiri bitirukko. 10 Ale kariimet sarenga namawasan mu kawel kilek memek duap duap te ninguru nunga kulokko. ^{▼▼2 Thes 2:9-10 Kawel biya: Mat 24:24; Rev 13:11-14.} Nuna sarenga namasan, mu awuk, nuna munan nunguning se den nunguning Kaem te nunga giokko mu karo tumonko miakasan. 11 Umutang ko, Kaem munan kawel sokel ago nunguningkiri nongote bitirukko, se nuna munan kawel mu ko nongomang ningi nunguning arukko. 12 Umutang te, arikaya den nunguning ko nongomang ningi me nunguning aram, bare kilek memek mu la betemonko amilmilakasan, mu suen la Tutera Tom te memek tamonko.

Paul Thessalonica Kris alo nongomang sokel tua ko den nunga maonam

13 Bare aga singsang alo, Kari Biya ninga kuawoso umutang, mu ana tom suen biya nina nego ko Kaem amilmil tunakko. Mu awuk, duap te nunguningkiri nu ninga balam noko mam, nina Korang Bur kako ninga awurok se, den nunguning mu ko nengemang ningi nunguning aruk se, nu mel ilagala mu te ninga giokko. 14 Umutang ko, nu den gilalong yawara ana balsan mu te ninga auram, nina nanga Biya Jesus Kristus ko nikitang te ilak bagaralko. 15 Buta se, aga singsang, aora tala sanami se bagaralko! Ale Kaem ko den ana nagiring te se tam gawa te ninga kasurman mu ilukuawuralko.

16 Se anananga nangamang mu iwita: nanga Biya Jesus Kristus kota, se nanga Nainet Kaem, nu nanga kueram ale ko gomang lila nangaram mu te tom suen biya nangamang sokel tuso se amilmil ago la nu nanga giokko kimi betesan, mu nuna nengemang sokel tumon ale, ninga betera kaora se ninga munak den te ninga sangarmon se yawarakala bagaralko.

17